धनी माझं कसं येईना अजून

धनी माझं कसं येईना अजून

दिस हा गेला रात चढली
कितीक बसावं सजून धजून
वाट पाहूनी डोळं थकलं
धनी माझं कसं येईना अजून ||धृ||

रातीचा मी शिणगार केला
शेज सजवूनी गजरा माळला
शालू नेसूनी तयार झाले
कुंकू ल्याले भांगातून ||१||

धनी माझं कसं येईना अजून

सांगून गेलं आठदिस झालं
कुठं आसलं कुना ठावं
लवकर येतो म्हनलं होतं
लढाईतून परतून ||२||

धनी माझं कसं येईना अजून

काळीज माझं चिमनी जसं
नाही काही थार्‍यावर
फोलपणा हा सजण्याचा
न जाई मनातून ||३||

धनी माझं कसं येईना अजून

- पाषाणभेद (दगडफोड्या)
३०/०४/२०१०

समोर आता येते कशाला

समोर आता येते कशाला

समोर आता येते कशाला ||धृ||

समोर आता येते कशाला, तिर नजरेचा
मारतेस मला
मदनबाण लागतो ग उरी, जखम खोलवरी
ठाव नाही ग तुला ||

समोर आता येते कशाला ||१||

याद असतीस मनी राहूनीया दुरी
काळीज धडधडता
काय न कळे ग मला होईल वेडा
असेच वाटे ग मला ||

समोर आता येते कशाला ||२||

वाटे संगती असावीस सदा, नयनी माझ्या
न गाळावे आसवांना
कितीदा तरी हसलो समोरी, तू ग उभी
तरीही न कळावे का तुला ||

समोर आता येते कशाला ||३||

- पाषाणभेद (दगडफोड्या)
२३/०४/२०१०